A che ce serve ca tu tutto guarde
e vire ‘e nuje ogni sbaglio e peccato,
pure si fatto rint’ ê nascundiglie
r’ ‘o scuro cchiù prufunno e scunfinato?
Ca ‘e penziere segrete ce ‘nduvine
pure si l’accuvammo
r’ ‘o silenzio pesante
sott’ a l’ammasso,
ca l’uocchio tuojo, curtiello celeste,
tutt’ ‘e bisbiglie ‘e st’ànema trapassa?
Si t’hê ‘mparato a una a una ‘e ppéne
ca ‘o chiarore r’ ‘e juorne
a nnuje fa truvà annanze,
mentre tu te ne staje sulo e te spiécchie
rint’ ô lluntano ‘e tutt’ ‘e lluntananze,
e saje a mmente ‘e vvie r’ ‘o chianto amaro
ca ce scavano ‘e ffacce,
pecché nun curre, ce viene vicino
e ce stringe cu fforza rint’ ê bbracce?
